Make your own free website on Tripod.com
Ez diren gauzak
Zazpi zaborruntzi kale baterrean
                                    (zazpiak lerroz lerro)
taparik gabe, ahora euliei zabal zabalik,
                tripazain.
Auzo honetako andere gizonek untziak
                    arretaz betetzen dituzte.
Hara hor gure soziologia material
                        eta sakonaren hondarrak,
boltsa astunetan edonondik eta
                            edonoiz datozen hondakin
enigmatikoak. Begira egiezu gorputz hutsoi,
                            zelan asebetetzen diren,
eta egin hiritarren behar intimoen
                        hitstoria
Zarama untziotan denetik, bizimodua
                                        eta bere soberakinak,
antropologia artxiboan baino humanitateari
                                    buruzko datu gehiago.
Hara hor botila hutsak, plastikoak
                            eta txatarrak,
saxofoi herdoildua, botika kadukatuak,
                                    kaiola txori hilak,
zaramapean metano gas lehergarri bihurtuko
                        diren sein-painal desetxableak.
Zazpi zaborruntzi kale baterrean
                                (zazpiak lerroz lerro).
Igarri metalezko ahoen mezua: ugarian
                                eta naharoan akabatuko gara,
dietak egin beharko ditugu gainbizitzeko
                            alde honetakoek,
bestaldekoak gosez egarriz eta euliz
                                    hiltzen diren bitartean.
Hara hor katu beltza zarama gaiean
                            eta heldu den agurea,
agure gaixo hori bidaiaren bat egiteko
                                    oinetakoen xerka agian.
Zazpi zaborruntzi irensle kale bazterrean
                        (zazpiak lerroz lerro)
etorkizuneko estetika, joankizuneko etika
                                zibilizazioaren poetika formulatzen,
bota tirante fosforezenteekin datozen
                        langile beilegien zain,
astiro eta astun materia birrinduz heldu den
                        kamioiaren zain.
 
[Sarrionaindiaren menura]
index mail